M iγiγden

Akken tessuli ameslay, bernent wallen-is, teẓẓel-as i tmettant deg irebbi-s, taγawsa tewweḍ bab-is. Taqcict tessefqad aẓekka n yemma-s yal ass, tettru fell-as war cceḥḥa, teqqim daγen d tuḥdiqt tuγ-as awal. Mi d-tewweḍ tegrest yessa wedfel am tmeḥremt tacebḥant γef uẓekka n yemma-s, akken d-tezzi tefsut, iḍall-d kan yiṭij akka acemma γef tmurt, iderrez-as baba-s tameγra n rrcil, yewwi-d tameṭṭut terna tegla-yas-d s snat terbibin. Tullas-nni d-tewwi yid-s cebḥen wudmawen-nsent mačči d kra, maca ulawen-nsent berrikit am tuggi taqburt yuli wabbu si ddγel d wayen icemten. Ngum akk d-rsen iḍarren-nsent deg wexxam, rzan-d yir ussan imcumen γef teqcict d-teğğa yemma-s d tagujilt. Tenna yiwet deg-sent i tayeḍ tullas-nni zdat-s : I uqerru-agi n teγyult, yid-neγ ara tedder ? Tenna-yas i nettat s udem-is : “ Win yebγan ciccu yezlu beεεu, win yebγan lesfenğ yefk nanna-s”, daγ kemm a tuḥrict ma yella-yam pappa “ aγrum” deg wul, yessefk a t-id-ssisnent tfettusin-im, ihi γas kker γef yiman-im, cemmer i iγallen-im ! Ẓedment fell-as di snat yid-sent, kksent-as s wesxenzeq akk iceṭṭiḍen imelḥanen d tarkasin tatrarin telsa, ḍeggrent-as deg wemḍiq n lqecc-nni tacekkart i uglim d icifaḍ i iḍarren-is “ Ssersent deg-s ayen ssersen waεbaben di Tmazγa”. Nnant-as : Wali, wali ay agejdur akka tettreqriq zdat-neγ s warquqen-ahin a tt-yeččen, treffed aεenqiq-is deg igenni am yelli-s n ugellid s uburrez d nnefxa ! Aha rfed tiqeṣrit-im tura, zwir akka zdat-neγ γer texxamt n usewwi ! Ttaḍṣant fell-as, ssenεatent-as anida d wacu yessefk ad tettḍummu yal ass. Tudert-is gar-asent tugar tin n yal taklit di tallit talemmast, teεkef seg wefraḍ n leγbar deg udaynin, aḍummu n iḥuccan deg wexxam d berra, aseyyeq, anejruḍ n usaγur, asired n iceṭṭiḍen, taruẓi n tregwa di tebḥirin, aḥuccu n weslen d wulmu terna tettagem-d aman si tala d wahin d tahin... Ayen akk yugaren adrar-agi n leqdic yuran di twenza-s, d ddemmar n yir lehdur d weskeεrer-nni skeεrirent fell-as terbibin n baba-s. Yal mi ara ṭṭreḍqent wallen-nsent fell-as, γas ma s tuddma, ibibbi d εeggu i d-tekcem s axxam, rennunt-as urfan, ssurugent kra γef tγerγert am yirden d wayen-nniḍen, ttgallant deg-s ar tefru iḥuccan fell-asen am wakken yessifif uγerbal aclim neγ ma tuder-as teḥdert n weγrum deg yimi. Ula d tameddit mi ara tesred, tefser tgeswaḥt yekkren ngum tanekra n wass si rrḍiḥ d nnṭiḥ war asteεfu, ur tt-id-yettṣaḥ ara ad tessers iγsan-is deg wusu, ala. Teggan γef tγerγert s iri n lkanun, d iγallen-is i d tasumta. Rnant-as llaqubat, ssawalent-as M iγiγden imi tt-tuli tebrek seg wabbu yakk d wammus n iγiγden.

Yiwen wass yekker baba-tsent ad yerzu γer walzuz ( agdaz, ssuq ) s uεudiw, yesteqsa tirbibin-is d acu ssarment ad sent-id-yeglu yes-s, yiwet tessuter deg-s iceṭṭiḍen imaynuten igerrzen, tayeḍ d tiwiztin. Yuγal yenna-yas i kemm a M-iγiγden, yella kra ad am-d-awiγ ? M iγiγden : Teẓriḍ a ba, afurek amezwaru a k-d-iqasmen deg webrid mi ara taliḍ γef teεrurt uεudiw ma d-tuγaleḍ s axxam, qerrem-iy-id aqeclaw-is, glu-yid yes-s ttxil-k ! Argaz yuγ-asent awal, yuγ-d iceṭṭiḍen imaynuten igerrzen d twiztin yerna yeṭṭef-d s lemεemmda abrid n teẓgi s axxam akken a s-d-qasmen ifurkan. Amezwaru d-yemmuger yewwet-it-id s acelqiε, yeγḍel-as ula d lemḍella yelsa i uqerruy-is, yegzem-d seg-s aqeclaw, yewwi-t-id yid-s. Mi d-yewweḍ s axxam yal ta yefka-yas ayen tessuter deg-s, maca ḥala M iγiγden i s-yennan tanemmirt-ik a baba. Azekka-nni tessefqed s aẓekka n yemma-s am yal ass, tewwi yid-s aqeclaw-nni, teẓẓa-t γef uẓekka, tettru, tettru, tettru almi uγalen imeṭṭawen-is ugaren taεwint, yeswa yis-sen uqeclaw-nni. Aqclaw-nni yegma yerna yeffeɣ-d seg-s yiwen useklu “ ttejra “ igerrzen. M iγiγden tuγal trezzu kraḍ ( 3 ) tikkal deg wass γef uẓekka n yemma-s, tettru, tettεenni seddaw useklu-nni. Yal tikkelt tettwali yiwen wefrux d acebḥan yettaddad ger ifurkan-is. Mi tεenna deg-s kra, a s-t-id-iḍegger din din war tuzzya d tunnḍa neγ yejneε yefneε, ugur ur yelli.

Yewweḍ-d wass ideg agellid n at Mliyikečč ira a d-yesseḥḍer tameγra ideg a tt-id-uraren iḍebbalen, icennayen, tawsa d waẓ akin, a d-yenced akk tullas n yal tamnaṭ akken ad yefren mmi-s tin a s-yeččaren tiṭ. Akken d-yewweḍ isali tirbibin n baba-s n M iγiγden, uccagent γer lewqam war ma uḥtament. Ssawḍent-as isali ula i nettat mi akken d as-ssawlent, nnant-as : Aha tura eğğ leqdic-nni, yya-d mceḍ-aγ iqerra-nneγ, wenneε-aγ, gerrez-aγ, ṣfeḍ-aγ daγen tarkasin alamma ttirriqent akken yessefk, nennubget s tujjma deg lberj ugellid ilmend n tmeγra ara yesker akken a d-yaf mmi-s tin ara yessenquqlen ul-is, ad tuγal d tameṭṭut-is. M iγiγden teqdec-asent akk ayen urğant seg-s, maca tettru daγen, acku ira wul-is ad teddu γer ccḍeḥ ula d nettat. Tessuter di ya n baba-s “ tameṭṭut n baba-s” ad as-tanef ad teddu d yessi-s. Ya n baba-s : Amek a yelli ? Kemm a M iγiγden yugaren sidna Yub ara yeddun s wammus d tebrek-nni yakk i kem-yulin γer tmeγra ugellid ? Ula d iceṭṭiḍen d tarkasin n menwala mačči tesεiḍ-ten am kemm am tezzyiwin-im, ad aγ-d-ternuḍ tura ccḍeḥ-im ? Ah a lalla, ah a lalla ! Seg wakken teggumma M iγiγden a s-tebru i wawal, terẓa-yas aqerru i ya n baba-s s uεenni, tuγal tesseγli-d imeslayen-agi seg yimi-s taggara, tenna-yas : Atan ssurgeγ-am iγiγden γer teqbuct n tεedsin, ad am-fkeγ snat tmirin (sswayeε), ma tessawḍeḍ tṣefḍeḍ akk lğerra iγiγden, terriḍ yal aεeqqa yettirriq amzun werğin yumis, ad medleγ allen-iw, ad am-anfeγ ad tedduḍ yid-sent. Taqcict akken tesla i lehdur-nni, teffeγ γer berra, terra γer deffir teḥnact, tessawel s igenni :

"Ay aεessas ur nettcax, ay at wass-a d yimiren. Aznet-iyi-d yakk ifrax, ceyyɛet-iy-id itbiren ! Yal wa s tqabubt s txenfuct, ad yeṣfeḍ iγiγden seg teqbuct !”

Tekcem γer teḥnact, tessa yiwet tmeḥremt tazedgant γef tγerγert, tesmar-d γur-s tiεedsin-nni s iγiγden isebken fell-asent, teslal kan taqbuct-nni s waman almi s-d-ččuren sin yetbiren tawwurt, din din ḍefren-ten-id akk yefrax yellan seddaw igenni, mecḥen akk iγiγden-nni. Itbiren rran akk tiεedsin s wenγab d uγiwel γer teqbuct, ur tewwiḍ ara timirt ( ssaεa ) tefra taluft, srafgen akk yefrax, uγalen s imeḍqan-nsen. Yennecraḥ wul n teqcict almi d ayen kan, tγil ad teddu γer tmeγra war uguren, tewwi-yas taqbuct-nni i ya n baba-s. Maca tameṭṭut tenna-yas : Ala a M iγiγden, ur tesεiḍ ara iceṭṭiḍen yerna ur tessineḍ ara ad tceḍḥeḍ, ad rwun kan deg-m medden taḍṣa ! Akken twala tserreḥ daγen teqcict d imeṭṭi, tuγal tenna-yas : Lemmer ad tṣefḍeḍ tikkelt-agi iγiγden seg snat teqbucin n tεedsin di yiwet timirt, ad tzemreḍ ad tedduḍ.“ Tenna-yas i wul-is“. D awezγi ad tefru taluft am ta. “ Akken d-terwi ya n baba-s snat teqbucin n tεedsin deg iγiγden, teffeγ daγen teqcict γer deffir teḥnact, tessawel s igenni :

Ay aεessas ur nettcax, ay at wass-a d yimiren. Aznet-iyi-d yakk ifrax, ceyyɛet-iy-id itbiren ! Yal wa s tqabubt s txenfuct, ad yeṣfeḍ iγiγden seg teqbuct !”

Tessa timeḥremt tazedgant γef tγerγert, tesmar γur-s tiεedsin-nni ulin iγiγden, wwḍen-tt-id daγen sin yetbiren d imezwura, drus kan almi d-ddan yefrax akk di lejfar-nsen am tikkelt tamezwarut, ur yewwiḍ ara wezgen n timirt taluft tefra, Faḍma teεqel argaz-is, ifrax bernen s anida d-kkan. Ul n teqcict yennecraḥ yules, tγil dayen tewweḍ asirem-is, ad teddu γer tmeγra. γas akken tessas-d ayen yellan d awezγi, ayen yugaren daγen tiwin n uyefki n tsedda di tculliṭ n mmi-s, n waman iγef mnaqaren idurar neγ tukksa n tmellalin ddaw tsekkurt ur tettfaq, maca tenna-yas ya n baba-s : Ur yelli d acu ad am-d-yawi yakk wannect-a, ala ur ttedduḍ ara yid-neγ, acku ur tesεiḍ ara iceṭṭiḍen yelhan yerna ur tessineḍ ara yakk ad tceḍḥeḍ, ur nestufa ara ad rwun deg-neγ medden taḍṣa di lğal-im. Tezzi-yas-d i M iγiγden s weεrur, ulint nettat d yessi-s-nni yessalayen iman-nsent, yettawin iεenqiqen-nsent deg igenni si zzux d lfux γer tcariṭ zzuγren iεudiwen, ğğant-as-d aḍu γer deffir, tḥulfa s yiman-is tmeγduṛt amzun iṣeffer-as wewtul. Akken d-tufa tegra-d kan iman-is deg wexxam, tekker terza γef uẓekka n yemma-as, tebded seddaw useklu, tettεenni, tessutur deg-s, teqqar-as :

“ Huzz iman-ik, mḥiḥḥed ttxil-k ay aseklu, akken igenni ideg tella yemma, s wureγ d lfeṭṭa ad iyi-d-yeglu !” Iḍegger-as-d wefrux-nni acebḥan tiqnedyar yettwaruccen s wureγ d lfeṭṭa yerna-yas-d tibacmaqin yettwaksun s leḥrir i iḍarren-is. S uγiwel i telsa M iγiγden tunṭict-nni n at igenwan, teṭṭef abrid s tazzla s axxam n tmeγra, ula d ya n baba-s d yessi-s ur tt-εqilent ara, γilent akk d yelli-s n kra ugellid n tmurt-nniḍen. Tugar Nuja Uteryel di ccbaḥa s tqendurt d tarkasin-nni d-telsa. Timcumin-nni ulac akk anta i wumi yenna wul-is deg-sent, ahat d M iγiγden tagi, ma yella kra n tin i tt-id-yemmektin imiren, tγil attan teẓẓel γef yiri n lkanun ulin-tt ilefḍan neγ tṣeffeḍ iγiγden i tεedsin. Akken ḍallent wallen n mmi-s ugellid fell-as, yebded wul-is kra n tegnit, lemmer i sen-yehwa i yizan a s-ččaren imi-s, tawwurt teldi, rgagin icekkaben-is wergaz akken yessefk. Yessekna aqerruy-is zdat-s almi d tikli ad yessuden iḍarren-is, yeẓẓel afus-is γur-s, yessuter deg-s s teḍṣa n wul d leḥdaqa ma yella yehwa-yas ad tecḍeḥ akk yid-s. Segmi i d as-rsen i ccḍeḥ deg sin yid-sen, iḥulfa wergaz s yiman-is amzun yekcem igenni wis sa ( 7 ), ur yezmir ara yakk a s-iserreḥ akken ad yecḍeḥ d tayeḍ akken yella ngum a tt-iwali mi akken ineṭṭeg am ifeṭṭiwej si ta γer ta. Ula mi ara d-temmeγ kra n yiwet seg sut tinzar yezgan ulint d asawen, a s-teẓẓel afus-is akken ad yecḍeḥ yid-s, yugi, yeqqar-asent : D tagi, d tagi kan ara ceḍḥeγ ! “ Sennig lewqam d txeṣṣart”. Akken qqerṣen iḍarren-nsen seg uzedwi d uhuzzu n tqeṣrit, d tikli ad tekfu tmeγra, tekker ad tuγal s axxam, ira ad yeddu yid-s a tt-iwanes deg webrid, acku ira daγen ad iẓer ansi-tt d win tt-ilan. Tesseɣfel-it kan almi yezzi udem-is γer tama-nniḍen, tekka tawwurt tessenser iman-is, teṭṭef abrid-is s tazzla, terwel. Yemdekwal-d kan, iger tamawt teffeγ, ulac-itt dinna, yeḍfer-itt si zdeffir. Akken d tikli a tt-awḍen iḍarren-is, tuγ-itt tegnit tessaweḍ yakan γer zdat wexxam, iwala-tt mi akken tekcem deg iseqqif, tezger-it kan, tekcem tessedreg aqerruy-is deg yiwet texxamt n yetbiren. Γas ur yessegmeḍ ara s tmuγli, ur iwala ara sani terra, maca icumm-itt γer din i tekcem, yurğa-tt dinna melmi ara d-teffeγ, almi i d-yejba baba-s n M iγiγden yufa-d mmi-s n ugellid yettrağu taqcict, yenna-yas : Ttnadiγ yiwet teqcict, ad tili tekcem γer texxamt-agi n yetbiren, teffer. Argaz yekker yeγḍel-d igenni γef tmurt, yesgerjej yakk taxxamt-nni, yeγḍel-itt-id, yesteqsa ul-is, yenna-yas : Tezmer ahat ad tili d M iγiγden ? Terreẓ akk texxamt, ulac d acu ufan. Uγalen kecmen s axxam, ufan tuγ yiwet teftilt d tamecṭuḥt kan akka, ula d tafat-is tettak anzi γer tin ttwalin wid yezεillimen, M iγiγden teẓẓel γef yiri n lkanun am tnamit, udem-is γumment-t tbuxin. A ziγ teffeγ si tewwurt n deffir n texxamt-nni, tewweḍ s temzizzelt γer ddaw useklu-nni i γer tettεenni, tekkes iceṭṭiḍen yakk d tarkasin-nni telsa, tessers-iten s ufella uẓekka n yemma-s, yeddem-iten wefrux-nni acebḥan, nettat terra-d ijerbuben-nni iqburen i idisan-is, tuγal s lemḥirat s amḍiq-is n tguni, teḍla tibuxin i wudem-is, teẓẓel am ulaxert γef yiri n lkanun, terra-tt i lweεd ucexxer. Azekka-nni akken tendeh daγen tmeγra, lγaci derrzen ttalsen, baba-s, ya n baba-s d yessi-s uγen abrid ula d nutni s axxam ugellid, nettat teεna aseklu-nni n tjuztin, tenna-yas :

“ Huzz iman-ik, mḥiḥḥed ttxil-k ay aseklu, akken igenni ideg tella yemma, s wuraγ d lfeṭṭa ad iyi-d-yeglu !”

Iḍeggeṛ-as-d wefrux acebḥan taqendurt yifen tin n yiḍelli-nni s waṭas. Irgazen akk yellan din mi akken tebded γef yimi n tewwurt n wexxam n tmeγra amzun tewwet-iten lmeγla, ffγen-d iseqḍiḍen n wulawen-nsen, ḥala aggur n tziri iγef terna ad temyuṭṭaf yid-s afus deg ufus. Mmi-s n ugellid yella yeṭṭef tiγmert, allen-is ceṭṭḥent akka d wakka ansi ara d-tejbu. Din din yenṭeg fell-as, yeẓẓel γur-s afus-is, yeḍṣa-yas seg wul, yessuter deg-s akken ad tecḍeḥ yid-s. Seg yimiren ḥala yid-s i d as-yers i zzwi-tt rrwi-tt, ulac akk tayeḍ i ira ad yecḍeḥ. Tin yecmumḥen yid-s si tidak-nni ur tettawi ara tγerγert si nnefxa, yini-yasent : D tagi kan, d tagi, ḥala yid-s ara ceḍḥeγ !!! Akken d tikli ad tekfu tmeγra, tuγal s axxam, mmi-s ugellid yeṭṭafar-itt s lexmata, ira ad iẓer anida tezdeγ. Tessemneε iḍarren-is γer yiwet tebḥirt d-yusan deffir wexxam, anida akken yella useklu n tfirsin-nni tiẓidanin am tamment. Teckunteḍ am jebbirdu γef useklu-nni, teffer aqerru-is ger ifurkan. Mmi-s n ugellid ur yeẓri anida tedda, igenni yerfed-itt, tiγerγert tessebleε-itt. Yurğa almi d-iεedda baba-s n teqcict, yenna-yas : “Taqcict-nni taberranit n yiḍelli, ula d ass-a tenser-iyi, ad tili teεluleq γef kra n ufurek n useklu-agi n ifires”. Argaz yesteqsa iman-is : “ tezmer ad tili d M iγiγden” ?, yewwi-d tagelzimt, ijeggeḥ akk aseklu-nni, yerra-t amzun d iεekkazen-nni iγef yettali ssenğaq, ufan aḍu iceṭṭeḥ, ma d taqcict tsumm-itt tγerγert. Akken kecmen s axxam, teḍra-yasen am yiḍelli-nni, anida d wamek tella M iγiγden i tt-in-ufan. Nettat tuḥrict tejgugel γef yiwen ufurek si tama, tenṭeg am tebkit γer wayeḍ di tama-nniḍen, tneggez γer tγerγert, terwel, teεna daγen Aseklu-nni n tjuztin, terra-yas i wefrux acebḥan iceṭṭiḍen icebḥanen, telsa ijerbuben, tuγal s amḍiq-is n tguni, anida tt-in-ufan teẓẓel. Ass wis-kraḍ n tmeγra, akken uγen abrid-nsen daγen iεeggalen n twacult s axxam n ugellid, teεna ula d nettat aseklu n tjuztin d-yemγin γef uẓekka n yemma-s, tenna-yas : “ Huzz iman-ik, mḥiḥḥed ttxil-k ay aseklu, akken igenni ideg tella yemma, s wureγ d lfeṭṭa ad iyi-d-yeglu !”

Iḍegger-as-d taqendurt yifen akk tiqnedyar ssnen yemdanen, werğin telli yiwet am nettat yerna-yas-d tarkasin n wureγ. Akken tewweḍ s axxam n tmeγra yebded-asen umeslay i lγaci-nni yellan din, wa yeεreq-as d acu a d-yini, wayeḍ γas ur yekcim ara εemrayen, maca ur yezmir ara a d-yessali awal, amzun yeṭṭef-it buberrak, yal wa, yal ta d acu n uεewwiq d-yemlal. Mmi-s ugellid ḥala yid-s kan i yecḍeḥ daγen ula d ass-nni, yeṭṭef deg wawal-is, yeqqar-asent akk i sut tεenqiqin-nni yulin deg igenni : γas ssersemt iman-nkent, nekk d tagi kan, d tagi, ḥala yid-s ara ceḍḥeγ !!! Akken d-yewweḍ lawan ideg ara teqqel s iγiγden yuran di twenza-s, ira wergaz a tt-yissiweḍ s axxam, a tt-iwanes deg webrid, maca nettat tessenser daγen iḍarren-is s uγiwel mi akken yezzi udem-is s anda-nniḍen. Ula d netta daγen d uccen, yendi-yas ticerket war ma tfaq. Yendeh i sin yemγiden-nsen, yenna-yasen : mi tt-twalam kan tusa-d, nneγlet tiquftin n llazuq γef tseddarin, ur tettut ara ula d iran ! Γas akken tessufeγ-d iman-is si tseddarin-nni ideg d as-teḍra am tin d-izegren asif aεebbas mi ara d-yeḥmel, maca tessegra-n deffir-s tarkast-is taẓelmaṭ, yeckunteḍ deg-s llazuq, yeqleε-as-tt-id. Mmi-s n ugellid yufa-d tarkast-nni tessegra deffir-s, yerfed-itt, yufa-tt d tameẓyant, d taleqqaqt yerna d ureγ akken ma tella. Azekka-nni yekker-d mmi-s ugellid, yuγ lewhi n webrid-nni tettaṭṭaf M iγiγden yal mi ara s-terwel, yewweḍ γer zdat wezrib yellan deffir n wexxam-nsen, yemlal-d baba-s d amezwaru, yenna-yas : Ḥala tin i wumi a d-tezg tarkast-agi n wureγ ara yuγalen d tameṭṭut-iw. “ Nnecraḥen wulawen n terbibin n baba-s n M iγiγden akken yessefk, acku γur-sent tiqejjirin gerrzent”. Tameqqrant deg-sent tewwi tarkast-nni γer texxamt-is, tedda yid-s yemma-s, maca ur s-d-tezgi ara, ur tezmir ara ad tessekcem tifednan-is timeqqranin. Tefka-yas yemma-s ajenwi, tenna-yas : Ax gzem tifednan-im ! Mi ara tuγaleḍ d tameṭṭut n mmi-s n ugellid, maεεac ad telḥuḍ γef uḍar. Taqcict tuγ awal n yemma-s, tegzem tifednan-is, tessekcem aḍar-is di tarkast, tessebleε teqreḥ, teffeɣ-d γer mmi-s n ugellid. Yessuli-tt sufella n teεrurt uεudiw-is, yesγam-itt zdat-s, yewwi-tt yid-s a tt-yerr d tameṭṭut-is. Yesεedda-ten uεessas zdat n uẓekka n yemma-s n M iγiγden, qqimen sin yetbiren γef tcebbubt n useklu-nni n tjuztin, akken wwḍen γer zdat-nsen, cnan-asen-d tizlit-agi : “ Tarkast teččur d idammen, tamnayt-agi ur tettneḥcam. Ihi tislit iwulmen, d tin n-teğğam deg wexxam“.

Mmi-s ugellid iḍall γer tarkast-nni, iwala ttfeggiḍen seg-s idammen, yebren aεudiw-is, yerra-tt s axxam, yenna-yasen : Ala, mačči d tagi i d tislit i d iyi-iwulmen, yessefk ad tqis weltma-s tarkast-agi ! Tekcem γer texxamt, tessekcem tifednan-is war uguren di tarkast, maca agerz-is yeggumma ad yekcem. Tefka-yas yemma-s ajenwi, tenna-yas : Ax gzem agerz-im ! Mi ara tuγaleḍ d tameṭṭut n mmi-s ugellid, maεεac ad telḥuḍ akk γef uḍar. Tuγ awal n yemma-s, tessekcem aḍar-is di tarkast s timdeḥḥest, tessebleε teqreḥ am weltma-s, teffeγ-d γer mmi-s ugellid. Yerfed-itt γef teεrurt n uεudiw-is, yesγam-itt zdat-s, yewwi-tt a tt-yerr d tameṭṭut-is. Akken wwḍen γer zadt useklu-nni n tjuztin, cnan-asen-d daγen yetbiren-nni tizlit-agi : “ Tarkast teččur d idammen, tamnayt-agi ur tettneḥcam. Ihi tislit iwulmen, d tin n-teğğam deg wexxam“.

Yessaked wergaz s iḍarren n tmeṭṭut, iwala iqaciren icebḥanen d-telsa uγalen akk d izeggaγen seg idammen. Yebren-as aqerru i uεudiw, yerra-tt s axxam, yanna-yasen : Ula d tagi mačči d nettat i d tislit iwulmen, yella kra n teqcict-nniḍen tesεam deg wexxam ? Baba-s n M iγiγden : Ala, ḥala yiwet yelli-s n tmeṭṭut-iw tamezwarut yemmuten. D tamecṭuḥt, tecmet, terka yerna teččur akk d iγiγden, d awezγi ad tili d tislit iwulmen. Mmi-s ugellid : Ssufγet-tt-id kan γer berra a tt-waliγ ! Ya n baba-s : Ala, M iγiγden tumes aṭas. Mmi-s ugellid : Nniγ-awen aha ssufγet-tt-id a tt-waliγ ! Teffeγ-d tmeṭṭut tebra i wallen-is, tessedreg akka acemma udem-is s ifassen-is, tekna zdat n mmi-s ugellid, netta yefka-yas tarkast-nni n wureγ. Teqqim γef yiwen uqejmur yersen deg wefrag zdat iseqqif, tessufeγ-d aḍar-is seg tqebqabin-nni n wesγar aquran telsa, tessekcem-itt deg tarkast-nni n wureγ, tusa-d fell-as s lqis. Akken d-terfed s uqerru, yessaked-itt mmi-s ugellid s allen-is, yeεqel-itt d nettat i d taqcict-nni iγef niqal yerhen temẓi-s lemmer ur tt-yufi ara. Isuγ si tmendit, yenna-yasen : D tagi, d tagi i d tislit iwulmen !!! Ya n baba-s d yessi-s ur d-tegri ara ula d tiqit idammen deg wudmawen-nsent, tekfa fell-asent ddunit. Mmi-s ugellid yewwi-tt di tkeṛṛust, akken wwḍen γer tewwurt tameqqrant n berra n lberğ-nsen, cnan-asen-d yetbiren tizlit-agi : Tarkast-a war idammen, tuklalem tiẓeṭ a tt-teččem. Tewwiḍ-d tislit iwulmen, anṣuf yis-m a tuḥdiqt, kcem !

Ass-nni i tendeh tmeγra n rrcil “ Zwaǧ”, yeγli-d igenni γef tmurt, iwaqquren derrzen yid-s tameγra, usan-d ula d lγaci n leεrac-nniḍen d tmura-nniḍen, sa ( 7 ) wussan d sa ( 7 ) wuḍan yeqqnen di tnelli reddḥen imenduyar, cennun icennayen, iεumm walluy d uṣubbu. Agellid s yimmad-is yennecraḥ wul-is ahdum imi tuγal d tameṭṭut n mmi-s, ula d ya n baba-s d yessi-s yessers deg-sent ayen ur nelli, sellkent ayen ur ččint γef wayen sεeddant fell-as. M iγiγden d mmi-s ugellid akken i uγalen d imγaren, ddren s tayri di talwit almi d taggara n tudert-nsen.